Leita

Í þessum öðrum hluta Niflungahrings Wagners syngur Christine Goerke hlutverk valkyrjunnar Brynhildar, sem kemst í hann krappan þegar hún tekur að sér að vernda tvíburana Sigmund og Signýju að skipun Óðins. Stuart Skelton og Eva-Maria Westbroek fara með hlutverk tvíburanna og Philippe Jordan stjórnar hljómsveitinni.

Eva-Maria Westbroek sópransöngkona fer með hlutverk skyttunnar Minnie í Villta vestrinu og stjörnutenórinn Jonas Kaufmann leikur útlagann Dick Johnson. Barítónsöngvarinn Željko Lučić syngur hlutverk Jacks Rance fógeta og Marco Armiliato stjórnar hljómsveitinni.

James Levine stýrir meistaraverki Wagners sem hefur ekki verið sett á svið hjá Met í rúman áratug. Einn helsti Wagner-tenór heims í dag, Johan Botha, tekur að sér titilhlutverk riddarans unga sem kastast á milli ástar og ástríðu.

Mikil hefð hefur skapast fyrir því að sýna þessar tvær óperur saman og hér er á ferðinni uppsetning Davids McVicar, sem notar sama sikileyska þorpið sem sögusvið. Marcelo Álvarez tekur að sér tenórhlutverkin tvö, Turiddu í Cavalleria Rusticana og Canio í Pagliacci. Rae Smith hannaði leikmyndina.

Heillandi ópera Zandonais, sem er innblásin af Inferno Dantes, snýr aftur á svið Metropolitan-óperunnar í glæsilegri uppfærslu sem síðast var sett á svið árið 1986. Sópransöngkonan Eva-Maria Westbroek og tenórinn Marcello Giordani fara með hlutverk gæfulausu elskendanna og Marco Armiliato er hljómsveitarstjóri.