Leita

New York Times sagði að Anna Netrebko væri „stórkostleg“ í hlutverki Toscu og nú tekur hún aftur við hlutverkinu vegna fjölda áskorana. Brian Jagde fer með hlutverk Cavaradossis listmálara og Michael Volle fer með hlutverk hins kaldhæðna Scarpia.

Anna Netrebko tekur hér í fyrsta sinn að sér hlutverk Adriönu Lecouvreur, frægrar leikkonu á 18. öld sem fellur fyrir stríðshetjunni Maurizio, en Piotr Beczała syngur hlutverk hans. Gianandrea Noseda stjórnar hljómsveitinni í þessum harmleik eftir Cilea og Sir David McVicar leikstýrir, en sviðið er að hluta til endurgerð af barokkleikhúsi.

Sópransöngkonan Anna Netrebko tekst í fyrsta sinn á við hlutverk Aidu fyrir Met og Anita Rachvelishvili syngur hlutverk Amneris, fjandkonu hennar. Aleksandrs Antonenko leikur stríðskappann Radamès og Nicola Luisotti stjórnar hljómsveitinni í uppsetningu sem er sannkallað stórvirki.

Metropolitan býður hér upp á hrífandi uppfærslu Deboruh Warner á einstakri óperu Tsjajkovskíjs, sem byggir á sígildri skáldsögu Púshkíns. Anna Netrebko og Dmitri Hvorostovsky fara með hlutverk elskendanna tveggja. Alexey Dolgov fer með hlutverk Lenskíjs og Robin Tricciati stjórnar hljómsveitinni.

Eftir að hafa slegið í gegn í Makbeð á síðasta leikári heldur sópransöngkonan Anna Netrebko áfram að kafa í dramatísk hlutverk Verdis, nú sem Leonora, hetjan sem fórnar lífi sínu fyrir ástir sígaunatrúbadors.

Eftir glæsilega frammistöðu í Eugene Onegin fyrir Metropolitan tekur Anna Netrebko að sér hlutverk annarrar kvenhetju Tsjaíkovskíjs í fyrri óperunni af tveimur þetta kvöld, en það er heillandi ævintýrið Iolanta. Í kjölfarið verður fluttur erótíski sálfræðitryllirinn Duke Bluebeard‘s Castle.

Stjörnusópransöngkonan Anna Netrebko sýnir einstaka túlkun á hlutverki hinnar grimmu lafði Makbeð og Željko Lučić fer með titilhlutverkið í fyrsta sinn fyrir Metropolitan. Í nístandi uppfærslu Adrians Noble á stórkostlegri aðlögun Verdis á harmleik Shakespeares fer Joseph Calleja með hlutverk hins göfuga Makdufs og René Pape leikur Bankó.

Anna Netrebko og Mariusz Kwiecien fara með hlutverk hinnar ástríku Tatjönu og hins hrokafulla Onegíns í rómantísku stórverki Tsjajkovskís. Í nýrri sviðsetningu Deboruh Warner er atburðarásin færð til loka 19. aldar. Sagan færist úr sveitabænum yfir í veislusalinn og kraftmikill snjóbylur veitir dramatíska umgjörð fyrir lokaþáttinn.

Anna Netrebko og Matthew Polenzani fara með hlutverk hinnar hverflyndu Adinu og hins ástfangna Nemorinos í nýrri uppfærslu Bartletts Sher á einni merkustu gamanóperu sögunnar. Mariusz Kwiecien leikur hinn rostafengna Belcore liðþjálfa og Ambrogio Maestri leikur Dulcamara, skemmtilega skottulækninn sem útbýr ástarelixírinn.

Stórkostleg túlkun Önnu Netrebko á dapurlegu kvenhetjunni í þessari nýju uppfærslu Laurents Pelly berst nú loksins á svið Metropolitan, alla leið frá konunglega óperuhúsinu í Covent Garden. Piotr Beczala og Paulo Szot fara með hin aðalhlutverkin og gestastjórnandinn Fabio Luisi stýrir hljómsveitinni.

Anna Netrebko hefur leikár Metropolitan-óperunnar að þessu sinni með túlkun sinni á ólánsömu drottningunni sem ótrúr konungur hrekur til vitfirringar. Hún fer með eitt merkilegasta ,,sturlunaratriði” óperusögunnar í uppfærslu sem skartar einnig Elinu Garanca í hlutverki keppinautar hennar, Jane Seymour, og Ildar Abdrazakow í hlutverki Hinriks VIII.