Leita

Sambíóin hefja á ný sýningar á uppfærslum Metropolitan óperunnar í endurbættu Kringlubíói nú í janúar. Um er að ræða beinar útsendingar frá þessu merka óperuhúsi, sem varpað er til 50 landa um allan heim og eftir tímabundið hlé er Ísland aftur komið í hóp þeirra 1.740 bíóhúsa sem sýna óperurnar.

Það er draumi líkast að sjá Renée Fleming sem Marskálksfrúna og Elīnu Garanča sem Octavian í glæstustu óperu Strauss. Í þessari nýju uppfærslu Roberts Carsen hefur sagan verið færð til endaloka valdatíðar Habsborgara. Günther Groissböck fer með hlutverk Ochs baróns og Sebastian Weigle stýrir hljómsveitinni í gegnum þetta hnökralausa meistaraverk.

Hin óviðjafnanlega Renée Fleming fer með hlutverk háskalega tálkvendisins sem heillar alla Parísarborg upp úr skónum í fallegri óperettu Lehárs. Hér er á ferðinni ný uppfærsla leikstjórans og danshöfundarins Susan Stroman sem hefur slegið í gegn á Broadway.

Stórkostlega sópransöngkonan Renée Fleming snýr aftur í einu af sínum vinsælustu hlutverkum, þar sem hún syngur heillandi ,,Tunglsönginn“ í fallegri ævintýraóperu Dvoráks. Tenórinn Piotr Beczala fer með hlutverk prinsins, Dolora Zajick leikur Jeziböbu og kraftmikli ungi meistarinn Yannick Nézet-Séguin stýrir hljómsveitinni.

Meistaraverk Verdis upp úr leikriti Shakespeares um Óþelló snýr hér aftur á svið Metropolitan-óperunnar. Johan Botha fer með titilhlutverkið á móti Reneé Fleming sem hlotið hefur mikið lof fyrir hlutverk Desdemónu. Semyon Bychkov stjórnar hljómsveitinni.

Renée Fleming er komin aftur eftir að hafa slegið í gegn í þessu hlutverki í uppfærslu Stephens Wadsworth fyrir Metropolitan. Einnig koma fram Stephanie Blythe og kontratenórinn Andreas Scholl. Hljómsveitarstjórn er í höndum barokksérfræðingsins Harrys Bicket.

Við opnunarhátíð leikársins 2008-2009 heillaði Renée Fleming alla viðstadda upp úr skónum þegar hún söng lokaatriðið í þessari einstöku hugleiðingu Strauss um listina og lífið. Nú flytur hún allt verkið, þar sem tónskáldið veltir fyrir sér eðli sjálfrar óperunnar.

Þessi saga um galdrakonu sem lokkar menn í eyjafangelsið sitt hefur orðið fjölda tónskálda að innblæstri fyrir óperur, en þeirra á meðal má nefna Gluck, Haydn og Dvorák. Renée Fleming fer með aðalhlutverkið í þessari útgáfu Rossinis og syngur á móti hvorki fleiri né færri en sex tenórum.